الزطلة سلاحنا

بقلم : مستوني بوثفذنين

كاين لكيقول بأن المغرب صوته غير مسموع دوليا و ما عندوا تا ورقة يضغط بها على المنظومة الدولية,فمثلا دوك كروش لحرام و مالين الرزازي لفشرق الأوسط عندهم البترول كيستعملوه كورقة ضغط بعض الأحيان.و كاع الدولة عندها شي لعيبة كتخلي صوتها مسموع.

أش بان لكم بلي المغرب عندوا أقوى ورقة لتخلي جميع الدول تركع له ,و تطلب معاه غير التعادل

هاذ السلاح السري هو الزطلة المغربية أولا البترول الأخضر.إيه الحشيش بإمكانه يخلي المغرب من أهم الدول لعندها البوفوار في العالم و نقدروا بالحشيش نكونوا من الأعضاء الدائمين في الأمم المتحدة

وعندنا حق الفيتوا.

بنتلكم خرفت و لا حماقيت

ولكن هادشي راه معقول أسيدنا.تخايلو معايا المغرب يقطع لحشيش على العالم

و الله تتنود قربالة فالعالم و كاع الحشايشية غيعلنوا عصيان مدني على الحكومات ديالهم.

راه لبلية صعيبة و هاد الزطلة المغربية راه عندها عرام ديال لمحبين و ليمشيو فسبيلها بعيد.أجي وسمح فطبيسلة راه مجياش. و كاين ناس كبار كبار فدول عظيمة و كيستعملو ومكاين غير جوان مور جوان.

و برم أمعلم.

غير عيشوا معي المنظر أوروبا بلا الحشيش المغربي, راه التسطية, غتلقا الشعب خارج برا في مظاهرات وكيطالب بالزطلة المغربية و مكاين غير شعارات و الإضرابات و الحيحة و كاين لغيمشي بعيد إدير شي مسيرة زطلاوية من أوروبا لكتامة و تشوفهم هازين وراق ديال جونات و لبركات و كيغنيو داك الديسك المشهورة

صوط البوب إنادي بجوانك ياخضرا

فرحوا يولاد بلادي كتامة صبحة حرا

تبوقتنا لازم تطلع بلبولا الحمرا

شيرا شيرا شيرا

يتبوق كاع الشعب بولادو و بناتو

شعارهم لكونات و المبوق سعداتو

شيرا شيرا شيرا

الشيرة المغربية مكيفها شيرا

سير دوق لكتامية و رواح رد عليا

شفتوا سلاح أشمن سلاح عندنا فين يبان ناواوي و الكيماوي هاد سلاح كيخلي الشعوب هي لتقلب الطبلة على الدولة ديالها إلى بغات دير لعيب مع المروك .

أه قبل ما نسالي بلا ما تقولو راني مبلي و لا شي لعيبة راه عمرني عرفت زطلة كدايرا يلاه تهلا و شري مضلة إلا كانت الشمس شري بارسول